Mga bagong programa at pelikulang aabangan sa 2019, pinasilip ng ABS-CBN
Ang inaabangang pagsabak ni Regine Velasquez sa talent show hosting at ang pagbabalik-primetime ni Angel Locsin ang ilan sa malalaking balitang hinatid ng “Family is Love Christmas Trade Event” ng ABS-CBN noong Martes (Nobyembre 27).
Pinasilip sa nasabing trade event ang star-studded na “The General’s Daughter,” kung saan gaganap na isang sundalo si Angel na mahihiwalay sa kanyang pamilya sa murang edad. Gagamitin siya ng mga kalaban ng kanyang pamilya para pabagsakin sila. Kasama rin sa teleserye ang mga batikang aktor na sina Albert Martinez, Eula Valdez, Janice de Belen, Tirso Cruz III, at Maricel Soriano.
“Idol Philippines” at “World of Dance Philippines” naman ay mga bagong reality talent show ng ABS-CBN na hango sa popular na talent search shows sa ibang bansa. Ang mananalo ng “World of Dance Philippines” ay may pagkakataong makapag-audition sa “World of Dance” sa Estados Unidos. Kabilang sa line-up ng reality game shows ang pagbabalik ng “Minute to Win It: Last Man Standing” at “PBB Otso.”
Hindi rin nagpahuli ang iWant, ang bagong streaming service ng ABS-CBN, sa pagpapakita ng kanilang mga programa gaya ng nag-viral na “Glorious,” ang “Spirits Reawaken.” Ilan sa mga bagong mapapanood ang “High,” “Project Feb 14,” “Story of My Life,” “The End,” “Commuters,” “Touch Screen,” “Find the Wasabi,” “Jhon en Martian” na pagbibidahan nina Arci Muñoz at Pepe Herera, at “Everybody Loves Baby Wendy” kasama si Alex Gonzaga.
Samantala, ipinakita rin ng ABS-CBN Films, na kinabibilangan ng Star Cinema at Black Sheep, ang kanilang mga pelikula sa darating na taon. Kasama rito ang “Eerie” nina Charo Santos-Concio at Bea Alonzo; “Heart of Mine” nina Richard Gutierrez, JM de Guzman, at Jennylyn Mercardo, “Sakaling Maging Tayo,” na unang pelikula ng McLisse; ang “Open” na pagbibidahan nina JC Santos at Arci Muñoz, “Clarita” ni Jodi Sta. Maria, at ang pelikula ng LizQuen sa direksyon ni Antoinette Jadaone. Patuloy naman na gigisingin ng “Kadenang Ginto” at “Los Bastardos” ang mga hapon ng mga manonood sa Kapamilya Gold. Hindi naman mawawala sa Primetime Bida ang “FPJ’s Ang Probinsyano,” ang “Halik,” at ang “Ngayon at Kailanman.” Mapapabilang din sa primetime ang “Mea Culpa” ni Jodi Sta. Maria, at ang “Nang Ngumiti Ang Langit” na pagbibidahan ng child star na si Sophia Reola.